Shkollat në Tiranë do të jenë ndër të parat që do të monitorohen me kamera inteligjente, në kuadër të projektit “Smart City”. Ministria e brendshme ka përzgjedhur 20 shkollat e para, 9-vjeçare dhe gjimnaze, të cilat do të jenë në vëzhgim të vazhdueshëm.
Por kjo është shoqëruar me kritika të forta nga ekspertë, të cilët ngrenë shqetësime për mungesën e transparencës dhe rrezikun ndaj privatësisë.
Avokati Asllan Dogjani, i ftuar në studion e QUO VADIS në Vizion Plus tha se me këtë duan ti kthejnë fëmijët në robotë, teksa shtoi se s’ka lidhje me sigurinë.
Po ashtu Edmond Liçaj, ekspert i teknologjisë, deklaroi se ne si shtet s’kemi një plan apo një vizion. Ai shtoi se na është cenuar sovraniteti digjital.
Pjesë nga biseda:
Liçaj: Nuk ekziston kamera me AI. Ajo nuk është teknologji, është një prej burimeve të teknologjisë.
Dogjani: Këta duan t’i bëjnë fëmijët robotë, duan të na bëjnë ne robotë. S’është çështje sigurie fare.
Liçaj: Neve nuk na thonë ndonjëherë “a ta bëjmë?”. Na tregojnë kur e kanë bërë. Ne s’kemi një plan, një vizion. Çdo vit del një plan i ri, rrëzohet i vjetri dhe del një tjetër. Prej 4 vitesh kemi bërë fushata kundër ekspozimit të fëmijëve që i nxjerrin prindërit në rrjetet sociale, zakonisht në plazh gjysmë të zhveshur. Fakti i zhvillimit të IA është prej fotografive dhe videove në rrjetet sociale prej vitesh. Është një sistem i ndërtuar në 20 vite. Tashmë nuk janë më vetëm pamje, por është marrja e sjelljes. Unë dua sjelljen tënde unike. Kjo është pjesa më e rrezikshme e këtij zhvillimi. Na është cenuar sovraniteti digjital. Hakerat iranianë që janë futur në 2021 nuk kanë dalë fare, janë aty. Hakerat, sot që po flasim, janë brenda sistemit. Nuk mund të futesh në BE kur nuk ruan dot të dhënat e qytetarëve të tu, e aq më tepër t’i monitorosh.
/vizionplus.tv
