JUventus bëhet gardh, Mireti mjafton për 3 pikët ndaj Fiorentinës

Që Alegri është një mjeshtër i maksimalizimit të pikëve kjo, nuk diskutohet. Dëshmia e fundit ishte sfida me Fiorentinën në Artemio Franki në sfidën e vlefshme për javën e 11 të kampionatit italian transmetuar në Tring. Suksesi 1 me 0 në transfertë u arrit përmes vuajtjeve të shumta në aspektin e lojës, por në fund përkundër kritikave dhe akuzave për një futboll mbrojtjes e jo dëfryes, Alegri dhe bardhezinjtë i përgjigjen me pikët në klasifikim, të cilat sot janë 26 , vetëm 2 më pak sesa Interi kryesues,. Goli i shpejtë i shënuar nga zonja e vjetër përmes Miretit në minutën e  10 u mbrojt me fanatizëm nga ekipi në tërësi dhe nga super Shcezni në veçanti. Në pjesën  e parë sidomos ai bëri dy ndërhyrje vendimtare ndaj  Niko Gonzales dhe Biragit. Nisja e pjesës së dytë ishte diçka më e mirë për miqtë, por rreziku në portën vjollcë ishte minimalist. E me kalimin e minutave dhe aktivizimin e Bonaventures në mesfushë, Fiorentia u rikthye të jetë agresive dhe e rrezikshme. Megjithatë bardhezinjtë ishin solide dhe shumë të saktë në veprimet mbrojtës në mënyrë të veçantë duke marrë një fitore jetike  kundër një skuadre e cila  në pjesën e parë të këtij sezoni ka qenë gjithnjë afër kreut, edhe pse javët e fundit skuadra është tronditur nga 3 humbje radhazi, përballë Empolit, Lacios dhe tanime Juventusit. Më herët në një tjetër ndeshje të Serie A, Roma bëri një përmbysje të çmendur përballë Leces së Ramadanit. Ndeshje e shkëlqyer e mesfushorit kuqezi që ishte pranë suksesit të madh në Olimpiko pasi jugorët shënuan me Alkvist në mesin e pjesës së dytë. Mirëpo në minutat 91 dhe 94 Azmun dhe Lukaku përmbysen  sfidën duke i dhënë Zhose Murinjos 3 pikë të çmuara që e ngjiten në kuotën e 17 pikëve në renditje.