Cardiffi do te jete ne qendër te vëmendjes këtë te shtunë, pasi ne stadiumin “Millenium” do te zhvillohet ngjarja me e rëndësishme futbollistike e vitit, finalja e UEFA Champions League. Për shkak edhe të çiftit finalist që është një dyshe gjigandesh, si Real Madrid dhe Juventus, edhe vëmendja do të jetë e shtuar.
Pritet që supersfida në fjalë të jetë një nga më të shtrenjtat e gjithashtu ndër më të shikuarat e dekadës së fundit në Evrope dhe kontinentet e tjera nëpërmjet televizionit. Real-Juventus do të transmetohet në 200 vende te botës dhe shikueshmëria pritet të arrijë ne qindra milionë telespektatorë. Në Shqipëri, emocionet e ndeshjes se madhe do të vijnë përmes platformës Tring dhe Vizion Plus me një transmetim plot surpriza nga stadiumi i finales.
Edhe Kardifi do të përfshihet nga një atmosfere feste dhe entuziazmi. 200 mije njerëz pritet të mbërrijnë nga Italia, Spanja dhe vendet e tjera të Evropës e botës ne Uells për të ndjeur nga afër ndeshjen në stadium, por edhe përreth stadiumit ne “fan zone”, te dedikuara posaçërisht për ata që nuk kanë një bilete për në stadium.
Të paktën 18 mijë tifozë të Juventusit do të nisën nga Italia për në Cardiffi me avionë, autobusë dhe makina private. Por mijëra të tjerë që jetojnë ne vende te ndryshme te Evropës. gjithashtu pritet të udhëtojnë për në Uells. Tifozët bardhezinj kanë prenotuar 1400 dhoma hotelesh në Cardiffi, ndërsa shumë të tjerë kanë zgjedhur Londrën dhe qytete te tjera të Uellsit, për t’u akomoduar, duke qënë se janë me makina private.
E njëjta gjë mund të thuhet edhe për tifozët e Real Madrid edhe pse mediat e mëdha sportive spanjolle shkruajnë se interesi i tifozëve të Real është pak më i vogël sesa ai i Juventusit. Masat e sigurisë të marra në Angli dhe Uells për finalen janë të jashtëzakonshme, aq me tepër niveli i sigurisë në Britaninë e Madhe vazhdon të jete i lartë.
