Kryeministri i Britanisë së Madhe, Boris Johnson mbajti fjalimin e rikthimit në detyrë këtë të hënë. Ai e nisi fjalën duke falenderuar qytetarët për durimin e treguar dhe për respektimin e masave.
“Çdo ditë e di që është e vështirë. Është e vërtetë që kjo është sfida më e madhe që vendi ynë duhet të përballet që prej luftës. Por është e vërtetë edhe që ne po bëjmë progres.”
Johnson shtoi se nuk mund të hidhet poshtë sakrifica e deritanishme e britanikëve dhe të lehtësohen masat menjëherë.
“Unë dua që ekonomia të ringrihet dhe të ecë shpejt. Por unë refuzoj të hedh poshtë sakrificën e qytetarëve britanikë dhe të rrezikoj një valë të dytë infeksioni. Ne akoma nuk mund të themi sesa shpejt apo ngadalë do të rihapemi. Është e qartë që do të mund të flasim për këtë çështje më mirë në ditët në vijim. Këto vendime do të merren me transparencë të plotë.”
Boris Johnson u rikthye në detyrë këtë të hënë pas një shkëputjeje disa-javore pasi ai vetë u infektua me koronavirus dhe madje ishte edhe në terapi intensive.
