Kryeministri Boris Johnson pas refuzimit të kalendarit të miratimit kërkuar nga qeveria, në pritje të një vendimi nga ana e europianëve për një shtyrje të mundshme të datës së largimit, ka njoftuar se do të pezullojë rishikimin e marrëveshjes së Brexit në parlamentin e Britanisë së Madhe
Pas këtij votimi, duke komprometuar seriozisht mundësitë e ratifikimit para 31 tetorit, kryeministri britanik u tha deputetëve se kishte për qëllim t’u kërkonte europianëve synimet e tyre për shtyrjen e kërkuar.
“Në pritje të vendimit të tyre, ne do ta pezullojmë këtë legjislacion”.
Johnson kërcënoi me tërheqjen nga Parlamenti të ligjit për aplikimin e marrëveshjes së Brexit dhe me zgjedhje të parakohshme parlamentare, nëse deputetët refuzojnë të përshpejtojnë miratimin e projektligjit, që do ta vështirësonte ratifikimin e tij deri më 31 tetor.
“Nëse parlamenti refuzon kryerjen e Brexit dhe vendos të shtyjë gjithçka në janar ose më vonë, projektligji duhet tërhequr dhe ne do të na duhet të hyjmë në zgjedhje të parakohshme”.
Ndërkohë deputetët kanë votuar kalendarin e miratimit të propozuar nga qeveria, që parashikon miratimin e projektligjit prej 110 faqesh deri të enjten në mbrëmje.
