John Bolton viziton Emiratet e Bashkuara Arabe këtë javë
Ambasada e Shteteve të Bashkuara në Emiratet e Bashkuara Arabe tha se këshilltari për siguri kombëtare i SHBA-së, John Bolton, do të udhëtojë në këtë vend, këtë javë.
Ambasada në Abu Dabi nuk i saktësoi datat e vizitës së planifikuar të Boltonit.
Ajo vjen në kohën kur Emiratet, Arabia Saudite dhe SHBA-ja po përpiqen t’i bashkojnë forcat për të izoluar Iranin.
Tensionet në rajon janë rritur prejse SHBA-ja është tërhequr nga një marrëveshje bërthamore midis Iranit dhe gjashtë fuqive botërore, vitin e kaluar, dhe ka nisur të rivendosë sanksione kundër Republikës Islamike.
SHBA-ja po ashtu ka rritur praninë ushtarake në Lindjen e Mesme.
Teherani, në përgjigje, ka paralajmëruar se mund të rinisë pasurimin e uraniumit më pranë niveleve të armëve bërthamore. /REL
