Joe Boyd ishte producenti i Pink Floyd dhe Eric Clapton. Më pas punoi për Warner Brothes, derisa e grishi muzika shqiptare, ajo që ne e quajmë saze. Kështu e quan edhe Joe Boyd, Saze, muzikën që kur e dëgjoi për herë të parë vendosi të kërkonte gjithnjë e më shumë prej sot.
“Ishte viti 1998 që kur për herë të parë dëgjova saze. Isha në Shqipëri për të tjera arsye. Bashkëshortja ime kishte ardhur për të parë Beratin, Korçën e vende që mbrohen nga UNESCO. Pikërisht atëherë dëgjova për herë të parë Saze, e prej asaj dite, kam studiuar shumë mbi të. Më ka ndihmuar në kërkimet e mia muzikologu Vasil Tole dhe të gjithë artistët shqiptarë që e njohin dhe bëjnë një muzikë të tillë. Ata kanë qenë gjithnjë gati t’i përgjigjen pyetjeve të mia.”
Joe është në Tiranë për të regjistruar këtë muzikë, pasi është i sigurt se këtë muzikë do të duhet ta dëgjojë e gjithë bota.
“Keni një muzikë shumë të bukur. Është mjaft e veçantë. Unë tanimë nuk jam Joe i dikurshëm që punoja për muzikën pop. Dhe muzika nuk është më e njëjta. Jam në kërkim të gjerave të veçanta”.
Por kur kthehet pas në kohë, puna me emra të mëdhenj përfshirë këtu muzikën për produksionet kinematografike apo produksionin për Pink Floyd e Eric Clapton, Boyd tregon se përvoja ka qenë e bukur, por është mirë të njohësh muzikë të re.
“Kur janë të rinj artistë si Eric Clapton apo Pink Floyd-ët e mëdhenj të dëgjojnë më shumë. Sepse duan të bëhej të mëdhenj, pastaj gjërat ndryshojnë. Megjithatë nuk mohoj dëshirën për t’iu rikthyer punës me shumë prej tyre, edhe me ata që nuk jetojnë më”.
Joe Boyd ngjiti në skenë sazen shqiptare bashkë me grupimin “Argjiro” që të tilla thesare të kulturës shqiptare i ka mbështetur gjithnjë.
