Në fshatin Lazarat të Bashkisë Gjirokastër është organizuar këtë të diel panairi ndërzonal, i cili ka për qëllim promovimin e vlerave rurale, bujqësore dhe blegtorale të zonës. Ky aktivitet, i pari në llojin e tij, i organizuar në fshatin e Lazaratit është një risi për banorët.
Në fokus të tij qëndron krijimi i marrëdhënieve sa më të shumta dhe të forta midis prodhuesve dhe shitësve. Pjesëmarrësit janë shprehur të kënaqur me një organizim të tillë, pasi, sipas tyre, do t’i shërbejë fshatit duke i krijuar një panoramë të re, ndryshe nga ajo që ka qenë deri më tani.
Lazarati nuk është vetëm fshati i drogës, sikurse për vite me radhë është bërë jehonë në media, përkundrazi ky fshat ka potencial të jashtëzakonshëm dhe ua mundëson të gjithë atyre që e zgjedhin edhe për ta vizituar. Zhvillimi i agroturizmit do t’i sillte zhvillim ekonomisë në këtë zonë dhe kjo mund të arrihet vetëm me aktivitete të tilla.
Panairi tërhoqi vëmendjen jo vetëm të banorëve vendas, por edhe vizitorëve që kanë zgjedhur Gjirokastrën për të kaluar fundjavën. Sipas organizatorit, Jaco Meci, aktivitete të tilla do të vijojnë për të ngritur gjithnjë e më shumë vlerat e fshatit. Në fshatin Lazarat banojnë rreth 4 mijë banorë, ndërsa gjatë viteve të fundit, si shumë fshatra të tjerë, edhe ky i fundit po përjeton eksodin masiv të të rinjve. Ajo që ndodhi në periudhën post-kanabis ishte një goditje e rëndë për ato familje të ndershme dhe të varfra që vazhdojne ende të jetojnë në Lazarat.
