Ish-sulmuesi i njohur anglez, Kevin Filips, fitues i “Këpucës së Artë” në Premier Ligë në vitin 2000, mendon se Anis Mehmeti nuk duhej të kishte lëshuar deklarata si ato në ditët e tij të para te Ipsuiç.
Pas fitores ndaj Derbi Kaunti, ku ai ishte protagonisti te të dy golat, futbollisti shqiptar deklaroi se skuadra e tij ishte “më e forta në kampionat”. Sipas FIlips, një deklaratë e tillë do i krijojë më shumë probleme klubit.
“Jo, nuk janë, pasi nuk janë në majë të klasifikimit. Mos të keqkuptohemi, janë një skuadër shumë e mirë, e kam thënë shumë herë që pres që të jenë në fund të kampionatit afër dyshes së parë, për të mos thënë një prej dy skuadrave aty. Por Koventri dhe Midëllsbrou janë skuadrat më të mira në kampionat për momentin pasi gjenden në dy vendet e para. Unë e kuptoj se pse Mehmeti doli dhe e tha një gjë të tillë, por është një deklaratë e madhe, pasi për momentin nuk janë në majën e klasifikimit. Nëse unë do të isha një nga shokët e skuadrës së tij, me shumë mundësi do i thosha që të mos e bënte atë lloj deklarate, pasi tashmë do të kthehesh në një objektiv për të tjerët javë pas jave”, ishin fjalët e FIlips.
