Një paketë aksionesh të Amazon me një vlerë që kalon 4 miliardë dollarë u shit nga themeluesi i kompanisë, Jeff Bezos.
Në një deklaratë për autoritetet, kryetari ekzekutiv i kompanisë dhe një nga njerëzit më të pasur në botë, tha se kishte shitur 24 milionë aksione të Amazon këtë muaj. Shitja e parë e 12 milionë aksioneve u njoftua të premten, ndërsa ditën e martë pasoi njoftimi për shitjen e 12 milionë aksioneve të tjera.
Shitja e fundit nga Bezos ishte në vitin 2021, raporton BBC .
Përveç kësaj, ai ka dhuruar aksione të Amazon për bamirësi në disa raste, më së fundi në vitin 2022.
Disa ditë më parë, kompania tha se planifikon të shesë 50 milionë aksione gjatë vitit të ardhshëm, të cilat me çmimet aktuale kapin vlerën e rreth 8.4 miliardë dollarëve.
Vitin e kaluar ai u zhvendos nga Seattle, ku është kompania, në Miami, një lëvizje që i kurseu 280 milionë taksa për paketën prej 4 miliardë dollarësh që shiti.
Kjo për shkak se fitimet mbi 250,000 dollarë nga shitja e aksioneve ose investimeve të tjera afatgjata tatohen me 7% në shtetin e Uashingtonit. Florida nuk ka të ardhura shtetërore ose taksa mbi fitimet kapitale./vizionplus.tv/
