Zëdhënësi i Presidentit, Tedi Blushi i është përgjigjur reagimit të ministres së Drejtësisë, Etilda Gjonaj, e cila u padit këtë të hënë në SPAK nga presidenti Ilir Meta.
Në reagimin e saj, Gjonaj tha se është gati t’i përgjigjet institucionalisht kallëzimit penal depozituar në SPAK ndaj saj dhe zyrtarëve të lartë të Ministrisë së Drejtësisë. Pas kësaj, Blushi iu drejtua me fjalët: “Edhe falsifikatore edhe krenare! Ti qofsh moj çupë!”
Gjonaj tha pak më herët në “Twitter” se do të respektojë Kushtetutën dhe siguron se është gati t’i përgjigjet jo vetëm SPAK-ut ligjërisht, por edhe presidentit Ilir Meta publikisht.
Përveç ministres Gjonaj, Meta paditi në SPAK edhe Gentina Devën dhe Etleva Haxhian. Ai i akuzon ata për shpërdorim detyre, falsifikim dokumentesh, përvetësim të titullit apo detyrës shtetërore dhe për ushtrim të ndikimit të paligjshëm ndaj personave që ushtrojnë funksione publike.
