Pas zgjedhjeve të së dielës, ku partitë tradicionale pësuan rënie dhe grupimet ekstreme arritën shifra rekord në mbështetje, Italia gjendet në një situatë paqëndrueshmërie, e cila duket se do të zgjasë.
Rezultatet e deritanishme flasin për një fitore të padiskutueshme për Lëvizjen 5 yje me 32% të votave, ndërsa qendra e djathtë fiton pozitën e koalicionit të parë me 35%.
Por gjithsesi ende nuk mund të flitet për një mazhorancë të qartë.
Lëvizja 5 yjet triumfoi, por gjithashtu feston Lega e drejtuar nga Matteo Salvini, e cila ka arritur një rezultat prej 18% duke tejkaluar Forza Italia, e cila numëron vetëm 14% të votave.
Partia Demokratike ka pësuar një humbje të thellë, duke qëndruar në pragun e 20% të votave, një rezultat ky që përjashton mundësinë e një “marrëveshjeje të gjerë” midis Renzit dhe Berluskonit për të formuar shumicën.
Ish-kryeministri Renzzi ka dhënë dorëheqjen pas rezultatit më të keq që ka patur ndonjëherë partia.
“Është e qartë se duhet të largohem nga udhëheqja e Partisë Demokratike. Rezultati është i dukshëm. Ne kemi bere shume gabime, por shpresoj qe PD do t’i mbetet besnike parimeve të saj për të qene jashtë çdo koalicioni.”
Tashmë nuk mungojnë skenarët që sugjerojnë bashkëpunim me partitë e vogla për të siguruar 40% që duhet për formimin e qeverisë.
Brenda aleancës së djathtë, Forza Italia e Silvio Berlusconit pësoi zhgënjim që deri një javë më parë ishte i paimagjinueshëm, pasi forcë e parë brenda këtij koalicioni rezultoi Lega e retorikës së fortë anti-emigracion.
Ata të cilët përfitojnë janë padyshim euroskeptikët e Lëvizjes 5 Yjet, të cilët votuesit i katapultuan si partia më e madhe në vend.
Zyrtarë të lartë të kësaj force deklarojnë se krijimi i një koalicioni qeverisës në Itali tashmë do të jetë i pamundur pa ta, një lajm që me siguri nuk e gëzon aspak Bashkimin Europian.
Gjatë muajve të fushatës, liderët partiakë përjashtuan me forcë mundësinë e krijimit të koalicioneve pas-zgjedhore.
Sidoqoftë, Italia ka një histori të gjatë të gjetjes së një rrugëdaljeje nga ngërçe në dukje të pazgjidhshme të politikës.
5 Yjet që dikur refuzonte të negocionte ndarjen e pushtetit, është tashmë e gatshme të ulet në tryezën e diskutimeve.
Në këtë pikë, Lega e Matteo Salvini-t do të kthehej në protagoniste. Teksa Berlusconi humbet lidershipin e qendrës së djathtë, Lega duket se mund të bëjë paqe me 5 Yjet për një bashkëqeverisje të mundshme, nisur nga fakti se dy partitë dikur ndanin qëndrime të njëjta.
Parlamenti parashikohet të mblidhet për herë të parë më 23 mars, ndërkohë që presidenti Sergio Mattarella nuk pritet të hapë bisedimet zyrtare për krijimin e qeverisë të paktën deri në fillim të prillit, duke e lënë Italinë por edhe Europën në udhëkryq.
