Përfshirja e kryeministrit të dorëhequr Sigmundur Gunlaugson në skandalin e “Panama papers”, po e çon vendin drejt zgjedhjeve të reja parlamentare. Kreu i ri i qeverise, ish-ministri i Agrikulturës, Johanson u zotua se do të punojë për mbajtjen e zgjedhjeve brenda këtij viti. Ai dhe partia progresiste në Islandë po shqyrtojnë kërkesën e subjektit më të madh opozitar, për të afruar datën nga pranvera e 2017 në vjeshtën e këtij viti. Por ndërsa vijon publikimi i emrave në radhët e biznesmenëve dhe politikanëve të përfshirë në këtë histori, në Panama presidenti i vendit Huan Karlos Varela ka njoftuar se do të ngrihet një panel ndërkombëtar për të ndihmuar hetimin për këtë çështje me qëllimin e vetëm transparencën e kësaj çështje. Ndërkohë në një shkrim të saj BBC ngre pyetjen “ku janë amerikanet” në skandalin e “Panama papers”. Sipas të dhënave të deri tanishme konsorciumi ndërkombëtar i gazetareve investigative ka identifikuar 211 persona, të cilët kanë kompani në SHBA për nuk dihet nëse janë apo jo shtetas amerikan. BBC citon ndër të tjera dhe portalin politiko që shkruan se shtetet e Delaware apo Nevadas funksionojnë në një farë mënyrë si parajsa fiskale, duke e bërë të panevojshme përfshirjen e tyre ne radhët e emrave te Panamasë.
