Shteti Islamik kërcënon sërish me sulme terroriste. Lideri i ISIS Abu Bakr Al Baghdadi është rishfaqur përmes nje mesazhi audio,që nëse rezulton i vërtetë hedh poshtë zërat për vdekjen e tij. Në mesazh bëhet thirrje për të goditur Turqinë dhe Arabinë Saudite. “Kamikazët duhet të sulmojnë dhe gjaku të derdhet lumë”, thotë Al Baghdadi. Një pjesë e mesazhit i është kushtuar betejës për çlirimit te Mosulit, qe ai e cilëson si luftë kundër myslimanëve. Në mesazh u bëhet thirrje irakianëve te mbrojnë qytetin kundër ushtrisë irakiane. “Mbajuni fort dhe mos u tërhiqni, luftoni deri ne vdekje armiqtë e Zotit. Kjo luftë po shton besimin dhe bindjen se ky është një prelud i fitores sonë”, ka thënë lideri i ISIS. Vendndodhja e Al Baghdadit mbetet e paqartë, por disa zyrtarë besojnë se gjendet ne Mosul përkrah luftëtarëve të tjerë. Ndërkaq, luftimet për Mosulin vazhdojnë. Forcat irakiane ndodhen në shënjestrën e snajperëve, ndërsa u duhet të pastrojnë edhe rrugët nga pajisje shpërthyese, si dhe të zbulojnë tunelet e fshehta që përdoren nga xhihadistët. Shqetësimeve për fatin e civilëve i është shtuar edhe deklarata e UNICEF se ISIS mund të përdorë fëmijë kamikazë.
