Andrew Mountbatten-Windsor, vëllai i Mbretit Charles, është larguar nga rezidenca e tij luksoze, konfirmoi të mërkurën një burim mbretëror, pas zbulimeve të reja që e lidhin atë me shkelësin seksual Jeffrey Epstein. Ish-princi 65-vjeçar shpresonte të qëndronte edhe për një periudhë më të gjatë në Royal Lodge, rezidencën e tij prej dekadash në Windsor, por sipas gazetës The Sun, ai u zhvendos në mënyrë diskrete të hënën në mbrëmje drejt një vile në Sandringham, në pronën mbretërore në Norfolk.
Burimi mbretëror konfirmoi se Andrew tashmë banon në Sandringham, megjithëse pritet që ai të kthehet herë pas here në Windsor gjatë javëve në vijim, ndërsa përfundon periudha e tranzicionit. Sipas një miku të cituar nga The Sun, publikimi i dosjeve të reja lidhur me Epstein e bëri të qartë se ishte koha që ai të largohej, ndërsa largimi u përjetua si tepër poshtërues, ndaj u krye larg vëmendjes publike.
Mbreti Charles i hoqi Andrew-t titujt e tij në tetor dhe deklaroi se ai do të zhvendosej, pasi dolën në dritë detaje mbi marrëdhënien e vazhdueshme të tij me Epstein. Monarku ka theksuar gjithashtu se simpatia e tij qëndron me viktimat e abuzimit.
Dosjet e reja të publikuara të premten nga Departamenti i Drejtësisë i SHBA-së përfshijnë email-e që sugjerojnë se Andrew ka mbajtur kontakte të rregullta me Epstein për më shumë se dy vjet, edhe pasi ky i fundit u shpall fajtor për krime seksuale ndaj të miturve. Andrew ka mohuar çdo keqbërje dhe më herët kishte deklaruar se nuk kishte ruajtur lidhje me Epstein pas dënimit të tij në vitin 2008, përveç një vizite në Nju Jork në vitin 2010, të cilën e kishte përshkruar si përpjekje për t’i dhënë fund marrëdhënies.
/vizionplus.tv
