Ish kryeprokurorja e Maqedonisë së Veriut merret në pyetje por “kyç” gojën

Historia e shantazheve në rastin “Reket” ka shkaktuar tërmetin më të madh politik të viteve të fundit në Maqedoninë e Veriut, ndërsa vijojnë hetimet për zbardhjen e së vërtetës.

Katica Janeva, shefja e dorëhequr e Prokurorisë speciale Publike është paraqitur sot përpara kolegëve të saj si e dyshuar dhe ka dhënë dëshminë për lidhjet e saj me rastin.

Janeva i tha Prokurorisë se shpresonte që deklarata e saj të ndihmonte në përshpejtimin e hetimit. Pavarësisht insistimit, ajo nuk iu përgjigj asnjë pyetje të gazetarëve.

Afera doli në dritë më 15 korrik, kur Janeva dha papritmas dorëheqjen si kryetare e prokurorisë. Në të njëjtën kohë, u arrestuan dy biznesmenë Bojan Jovanovski dhe Zoran Milevski, të cilët dyshohet se ishin truri i shantazhit të qëllimshëm.

Jovanovski, i njohur edhe si “Boki 13”, një personalitet ekscentrik i mediave dhe bashkëpunëtori i tij thuhet se i kanë premtuar oligarkut Jordan Kamçev që të përdorin ndikimin e tyre për ta mbrojtur atë nga ndjekja penale. Kamçev dyshohet se ka paguar 1.5 milion euro.

Për shkak të mungesës së reformave në fushën e sundimit të ligjit, pakënaqësia ndaj qeverisë së Zaev është në rritje. Sa i përket politikës së jashtme, vendi është nën presion sepse fillimi i negociatave për anëtarësim në BE në qershor është shtyrë, pjesërisht për shkak të rezervave në Francë, Holandë dhe Gjermani për mungesën e masave antikorrupsion dhe reformave shumë të ngadalta gjyqësore.