Ish-kryeministri Sali Berisha ka shfrytëzuar çështjen e 3 inceneratorëve për të mbështetur akuzën se qeveria nuk ka prioritet sektorët jetikë të ekonomisë së vendit.
Gjatë një takimi me fermerët e Shkallnurit në Durrës, Berisha ka deklaruar se inceneratorët janë një skemë për të marrë para nga buxheti i shtetit.
SALI BERISHA
ISH-KRYETAR I PD“Ju keni dëgjuar këto javë për çështjen e djegësave, me të cilën janë vjedhur 420 milionë euro. Ju informoj se në Ballkan ka vetëm një djegës plehrash. Nuk ekzistojnë. Shqipëria me tre dhe nuk janë asnjë. Një skemë për të vjedhë sa më shumë. Imagjinoni sikur këto 420 milionë euro të ishin investuar në mbështetje të bujqësisë, se ku do ishim? Pra gjithçka bazohet në një skenë abuzimi, shpërdorimi, vjedhje dhe dizinteresi të plotë,”
Berisha premtoi se kur demokratët të vijnë në pushtet, qeveria do të rrisë buxhetin për bujqësinë.
“Fermeri nuk ka taksa, fermeri rimbursohet për ato që paguan. Nuk do ketë taksa në shitje. Do ketë rimbursim për të gjithë shpenzimet që bën. Askush nuk humbet nga kjo, asnjë vend. Përkundrazi, fiton dhe vetëm fiton.”
Berisha përsëriti se 6 marsi, përtej zgjedhjes së kreut të ri të bashkisë së Durrësit, ka rëndësi për të ardhmen e vendit, duke i ftuar të votojnë Ardian Mukën.
“Ardi Muka do ketë një vëmendje dhe do shfrytëzojë të gjithë potencialet e bashkisë me të gjithë mundësitë që i krijohen për t’ju mbështetur ju. Zgjedhja e tij më 6 mars do të jetë mesazhi i shpresës së madhe dhe i kthesës së madhe që ne synojmë të ecim të sigurt drejt një fitore të ardhshme të Partisë Demokratike”
Bashkia e Durrësit është bashkia ku Sali Berisha ka shkuar më shpesh prej fillimit të fushatës zgjedhore për 6 marsin.
