Ish fusha e aviacionit në fshatin Lumalas të Korçës është mbushur sistematikisht me plehra, inerte por edhe prodhime bujqësore të pashitura të fermerëve. Prej shumë vitesh kjo fushë e ndodhur përgjatë aksit nacional Korçë-Pogradec është pa asnjë funksion, por edhe pa ruajtje, çka ka bërë që fermerët apo edhe të tjerë qytetarë ta përdorin si fushë për të hedhur mbeturina të ndryshme. Edhe vetë banorët e fshatrave përreth fushës pranojnë se kjo fushë nuk ka asnjë funksion, e kjo sipas tyre e “ligjëron” disi edhe hedhjen e mbeturinave.
Në lidhje me këtë situatë prefekti i qarkut të Korçës Dhori Spirollari është treguar i prerë kur tha se do të ketë gjoba jo vetëm për personat që ndotin ambjentin por edhe për bashkitë që e lejojnë një gjë të tillë. Nga ana tjetër sipas tij fusha e Lumalasit gëzon një status të veçantë pasi aty së shpejti do të nisë zbatimi i studimit të fizibilitetit të hartuar më parë, i cili do e kthejë përsëri në një aeroport ku do të mund të kryhen fluturime sportive e turistike:
Bashkia e Korçës ka nisur tashmë punën për rrethimin e fushës dhe më pas do të kryhet edhe pastrimi i saj, si dhe disa elementë të tjerë të nevojshëm për të siguruar rikthimin e kësaj fushe në funksion të fluturimeve sportive e turizmit. Fusha e aviacionit në Lumalas të Korçës ka një gjatësi prej rreth 3 km, ajo ka funksionuar si aeroport funksional prej vitit 1924-1944. Ajo përdorej për transportin e brendshëm ajror duke siguruar lidhje me Tiranën, Shkodrën, Peshkopinë etj.
