Apeli i Posaçëm konfirmoi vendimin e shkallës së Parë duke lënë në burg ish-deputetin e partisë socialiste, Alqi Bllako. Para ditë më parë, përmes avokatit të tij, Bllako i kërkoi Apelit ndryshimin e masës së sigurisë, për tu liruar nga qelia, por kërkesa u rrëzua këtë të shtunë nga gjykata.
Edhe në këtë seancë, Bllako u shpreh se nuk ka asnjë lidhje me shpronësimin e tokës dhe ndryshimin e statusit juridik të pronës mbi të cilën u ndërtua më pas inceneratori i Fierit. Në këtë rast, ai dyshohet se falsifikoi dokumentet dhe shpërdoroi detyrën
Në rastin e tokës ku u ndërtua inceneratori i Fierit dyshohet se është i përfshirë edhe ish-ministri i Mjedisit Lefter Koka dhe zyrtari tjetër Pëllumb Abeshi, të dy tashmë të arrestuar.
Sa i takon punësimit të babait të tij në inceneratorin e Tiranës, Bllako shpjegoi se në atë periudhë ai nuk punonte në Ministrinë e Mjedisit si Sekretar i Përgjithshëm, por ishte në Presidencë.
Por përfaqësuesi i SPAK, i qëndroi pretendimeve se Alqi Bllako përfitoi rreth 15 milionë lekë si paga për babain e tij, për shkak se favorizoi kompanitë e inceneratorëve.
Hetimet për dosjen e impianteve të djegies së mbeturinave po vijojnë dhe sipas burimeve nga prokuroria e posaçme antikorrupsion, pritet të ketë të tjera arrestime.
