Irani përpjekje për marrëveshjen bërthamore
Irani vazhdon përpjekjet e tij për të shpëtuar nga sanksionet e SHBA-se dhe Bashkimit Europian, pas tërheqjes se Uashingtonit nga marrëveshja bërthamore e vitit 2015.
Ministri i Jashtëm Iranian Mohammad Javad Zarif zhvilloi një takim këtë të martë në Bruksel me shefen e politikës së jashtme të BE-së, Federika Mogherini, për të siguruar mbështetje për paktin mes Iranit dhe 6 fuqive botërore.
Biseda e cila zgjati disa orë, do të pasohet nga një tjetër takim me ministrat e jashtëm të tre vendeve të tjera nënshkruese të marrëveshjes, Gjermanisë, Francës dhe Britanisë.
Para takimit në Bruksel, Zarif zhvilloi një vizitë në Rusi ku u takua me ministrin e jashtëm Sergei Lavrov.
Këtë të martë presidenti rus Vladimir Putin zhvilloi edhe një bisedë telefonike me presidentin francez Emmanuel Macron, ku në fokus ishte Marrëveshja Bërthamore, e njohur si Plani i Përbashkët i Përbashkët i Veprimit, i nënshkruar nga Rusia, Kina, Britania, Franca, Gjermania dhe Bashkimi Europian.
Presidenti i SHBA, Donald Trump njoftoi tërheqjen e Uashingtonit më 8 maj, me pretendimin se Teherani ka shkelur marrëveshjen dhe ka vazhduar testimin e raketave balistike dhe ka financuar terrorizmin në Lindjen e Mesme.
BE ndërkohë shpreson të bindë Teheranin që të vazhdojë t’i përmbahet marrëveshjes, si dhe kritikoi ashpër vendimin e Trump për tërheqjen nga pakti.
