SHBA ka zgjeruar presionin ekonomik ndaj Iranit duke vendosur sanksione të reja ndaj 60 individëve, kompanive dhe anijeve të lidhura me Teheranin. Sekretari amerikan i Thesarit, Scott Bessent paralajmëroi se vendet që vazhdojnë të tregtojnë me Iranin mund të përballen me përjashtim nga sistemi financiar i bazuar në dollar.
Irani nga ana tjetër ka reaguar me kërcënime. Ministri i Ekonomisë, Ali Madanizadeh, tha se vendi është i përgatitur për sanksionet amerikane, ndërsa zyrtarë të Gardës Revolucionare paralajmëruan se çdo goditje ndaj infrastrukturës iraniane mund të pasohet nga sulme ndaj interesave amerikane dhe infrastrukturës energjetike.
“Natyrisht, armiqtë kanë ndërmend të nisin një sulm terrorist ekonomik ndaj nesh, por ne gjithashtu kemi mjetet tona dhe dimë si ta luajmë lojën. Mbrojtja jonë nuk është më aq mbrojtëse; armiqtë duhet të presin për një sulm.”, tha Ali Madanizadeh, ministri i Ekonomisë, Iran.
Përveç përplasjes ekonomike, tensionet po ndikojnë edhe në trafikun detar. Ngushtica e Hormuzit po përballet me një rënie të fortë të lëvizjes së anijeve. Të hënën, vetëm dy anije mallrash kaluan nëpër ngushticë, niveli më i ulët që nga fillimi i majit.
Megjithatë, masat e reja nuk përfshijnë institucionet financiare kineze, të cilat dyshohet se lehtësojnë tregtinë e naftës iraniane. Teherani shpreson që Kina, Rusia dhe partnerët e tjerë tregtarë ti rezistojnë presionit të Uashingtonit.
Në të njëjtën kohë, Pakistani po përpiqet të mbajë gjallë kanalin diplomatik me Teheranin. Ushtria pakistaneze tha se në bisedimet e fundit është bërë përparim në çështje si shmangia e përshkallëzimit të konfliktit dhe rihapja e Ngushticës së Hormuzit. Megjithatë, deri tani nuk ka shenja të qarta për një zgjidhje diplomatike.
/vizionplus.tv
