Shërbimi ndërkombëtar i monitorimit të internetit NetBlocks e ka cilësuar ndërprerjen e internetit në Iran si një nga më të rëndat në nivel kombëtar që janë regjistruar ndonjëherë në botë. Sipas tij, ndërprerja ka zgjatur mbi 240 orë dhe është e dyta më e madhe në vend pas asaj që ndodhi gjatë protestave të janarit.
Sipas raportimeve, Irani ka kaluar rreth një të tretën e vitit 2026 me kufizime ose ndërprerje të internetit.
⚠️ Update: At 240 hours, #Iran's internet blackout is now among the most severe government-imposed nationwide internet shutdowns on record globally, and the second longest registered in Iran after the January protests, with the country having spent a third of 2026 offline. pic.twitter.com/LPoVkOI9MM
— NetBlocks (@netblocks) March 10, 2026
Bllokimi i rrjetit pas protestave
Në janar, autoritetet në Teheran ndërmorën një fazë të ashpër të kontrollit dixhital për të izoluar protestuesit nga rrjeti satelitor Starlink, i cili ishte kthyer në një nga mënyrat e fundit për të komunikuar me botën e jashtme pas bllokimit të gjerë të internetit nga shteti.
Aktivistët dhe ekspertët e teknologjisë raportojnë se autoritetet përdorën sisteme të fuqishme ndërhyrjeje (jamming) që dobësuan ndjeshëm lidhjet satelitore. Si pasojë u regjistruan ndërprerje të shpeshta, humbje të mëdha të të dhënave dhe pamundësi praktike për përdorimin e rrjetit në shumë zona të vendit.
Strategjia e ndërhyrjes teknologjike
Irani ka përvojë të gjatë në kontrollin e spektrit elektromagnetik, duke ndërhyrë në transmetime satelitore, rrjete celulare dhe internet. Edhe pse Starlink përdor satelitë në orbitë të ulët dhe lidhje të koduara, ai nuk është i paprekshëm.
Sipas ekspertëve, autoritetet nuk synojnë të rrëzojnë plotësisht sistemin, por ta bëjnë atë të paqëndrueshëm në zona të caktuara, përmes ndërhyrjeve me fuqi të lartë. Kjo e bën lidhjen të ngadaltë dhe të pasigurt, duke e bërë të vështirë përdorimin për transmetimin e informacionit dhe organizimin e protestave.
Raportet teknike tregojnë se në disa zona humbja e paketave të të dhënave ka arritur deri në 80%, çka tregon ndërhyrje të forta në sinjal.
Analistët e krahasojnë këtë metodë me ndërhyrjet në sinjalet GPS dhe satelitore që janë përdorur në konflikte të tjera, si në Ukrainë, por në këtë rast teknologjia përdoret brenda vendit për të kufizuar komunikimin e qytetarëve.
Sipas ekspertëve, strategjia e autoriteteve është e qartë: nëse komunikimi bëhet i ngadaltë, i pasigurt dhe i paqëndrueshëm, ai humb funksionin e tij si mjet për mobilizim masiv.
/vizionplus.tv
