Interi mori një fitore me rëndësi mbrëmjen e të shtunës teksa mundi Bolonjën në shtëpi me rezultatin e pastër 3-1. Skuadra e Contes ka gjetur tanimë rrugën që i mungonte prej kohësh duke u kthyer përsëri në vendin e dytë në klasifikim. Sa i përket takimit, rezultati u zhbollokua shpejt me Lukakun i cili nuk gaboi para portës.
Zikaltërit e Milanos nuk u mjaftuan me kaq, kur në fund të pjesës së parë Hakimi dyfishoi rezultatin duke ia bërë dhe më të vështirë lojën miqve.
Edhe në fraksionin e dytë të lojës, Interi u shfaq më dominues në fushë për të gjetur golin e sigurisë . Megjithatë skuadra e Mihaljovic nuk u dorëzua dhe në momentin më të mirë ndëshkoi ziklatërit me golin e Vinjatos. Nga ana tjetër, vetëm 5 minuta më vonë Hakimi bëri sërish detyrën dhe vulosi suksesin përfundimtar të sfidës me shifrat 3-1. 3 pikë me rëndësi këto për Interin që shkon në kuotën e 21 pikëve , 2 më pak se Milani i vendit të parë .
Më herët dhe Juventusi fitoi me përmbysje në derbin torinez . Edhe pse të parët që shënuan ishin torinezët me Nkoulou , skuadra e pirlos reagoi shpejt , si fillim me Mekkejn dhe në fund me Bonucin që siguroi edhe 3 pikët e takimit. Një fitore që e ngjit Juventusin në vendin e tretë në ndjekje të Interit dhe Milanit kryesues.
