Juventusi është skuadra e parë finaliste në Kupën e Italisë, pasi arriti të eliminonte rivalët historik të Interit.
Bardhezinjve iu mjaftoi një barazim pa gola duke mbrojtur rezultatin e ndeshjes së parë gjysmëfinale në Milano të mbyllur me shifrat 1-2. Antonio Conte nuk ia doli të thyente dot ish nxënësin e tij Andrea Pirlo, me këtë të fundit që bëri çmos që ta fitonte ndeshjen.
Edhe pse një barazim pa gola, rastet nuk munguan për të dyja skuadrat.
Në pjesën e parë sulmi zikaltër kishte më shumë hapësira por u tregua i pasaktë përpara portës ndërsa në të dytën bardhezinjtë ishin të pakalueshëm. Zonja e vjetër kishte mundësi të mira me Ronaldon por ylli portugez nuk arriti të kalonte dot Handanovic që mbajti gjallë shpresat e skuadrës deri në fund.
Megjithatë kaq nuk mjaftoi për Interin që eliminohet nga Kupa e Italisë dhe tani e sheh veten në garë vetëm për kampionat.
Ndërkohë Juventus ka vëmendjen maksimale tek sfida mes Atalantës dhe Napolit, fituesi i të cilës do të përballet me të në finalen e 19 majit. Deri më tani vetëm Aleks Sandro nuk do të jetë i gatshëm për teknikun Pirlo pasi mbrojtësi brazilian plotësoi numrin e kartonëve të verdhë.