Interi fitoi kupën e Italisë për herë të 9 në histori. Zikaltërit mundën me jo pak vështirësi Fiorentinën 2 me 1 në finalen e luajtur në Olimpiko të Romës.
Hero i skuadrës ishte Lautaro Martinez, autor i një dygolëshi që përmbysi avantazhin e shpejtë të toskanëve, me anë të Niko Gonzales.
Suksesi i skuadrës së Interit ka shumë rëndësi edhe në palin psikologjik para finales së madhe të Championsit kundër Manchester Cityt në 10 qershor, ku pavarësisht shkallës shumë të lartë të vështirësisë se kundërshtarit, Zikaltërit ëndërrojnë mrekullinë.
Tani për tani ata mund të festojnë trofeun e parë sezonal, ndonëse vjollcët ishin një ekip i denjë për të merituar edhe ata suksesin për nga mënyra sesi luajtën. Goli i minutës 33 nga Niko Gonzales i bëri të ëndërrojnë.
Mirëpo, hapësirat e mëdha në prapavijë dhe cilësia e sulmit të Interit bëri diferencën në vazhdim.
Pas një rasti të pastër të Xhekos, në minutën e 29 ishte Lautaro që barazoi shifrat. 8 minuta më vonë argjentinasi shënoi një gol të bukur pas pasimit të dhënë nga Barela, duke përmbysur gjithçka.
Në pjesën e dytë Interi qëndroi prapa për të mbrojtur rezultatin dhe kjo bëri që Fiorentina falë një futbolli të bukur, të krijonte disa raste shumë të mira për barazimin e ndeshjes.
Mirëpo Kastrovili, Kabral, Gonzales, Biragi dhe veçanërisht Jovic në tre raste humbën mundësi të arta për ta çuar ndeshjen në shtesë.
Gabime fatale që e çuan Interin e Inzagit tek suksesi, ndërsa duke qëndruar tek trajneri zikaltër, duhet thënë që ai ka fituar 7 finale, nga po kaq të tilla të luajtura në karrierë.
