Inflacioni, treguesi që mat ndryshimin e çmimeve të konsumit ka arritur rekord të ri. Gjatë muajit korrik sipas INSTAT, inflacioni kapi nivelin e 7.5%, më i larti i regjistruar në dy dekadat e fundit.
Ajo që vihet re është se nga muaji i kaluar, kur inflacioni ishte 7.4% ka një ngadalësim të ritmit të rritjes.
Por nga erdhi më së shumti rritja e çmimeve për muajin korrik?
Si edhe në muajt e kaluar, rritjen më të ndjeshme e kanë shënuar grupi i ushqimeve, e pasuar edhe nga rritja e çmimit të karburanteve.
Ndërkohë të gjithë sektorët e ekonomisë janë në shtrenjtim çmimesh.
Është kjo arsyeja pse një javë më parë Banka e Shqipërisë rriti për të tretën herë normën bazë të interesit të lekut, si përpjekje për të frenuar rritjen e mëtejshme të inflacionit.
Sipas pritshmërive të Bankës së Shqipërisë, norma e inflacionit do të kulmojë mes 7 dhe 8% për të patur më pas një stabilizim.
Por këto parashikime shoqërohen me shumë pasiguri, ndaj mbetet për t’u parë ecuria e mëtejshme e çmimeve.
