Ministria e Bujqësisë informoi të premten se nga Brazili nuk është importuar mish viçi gjatë periudhës nëntor 2016-mars 2017.
Duke marrë shkas nga disa shkrime në media të cilat referonin se në vendin tonë po importohet mish viçi i prishur nga Brazili, Ministria e Bujqësisë sqaron se, nga informacionet e ardhura nga AKU për periudhën nëntor 2016 deri në mars 2017 nuk ka asnjë ngarkesë të ardhur me mish viçi nga Brazili.
“Nga Brazili gjatë kësaj periudhe janë futur në vendin tonë vetëm produktet mish pule dhe mish derri”, thuhet në një njoftim të ministrisë së Bujqësisë.
Më herët në media u bë e ditur se autoritetet braziliane kanë pezulluar 33 zyrtarë të qeverisë pas investigimit të zbuluar se disa nga prodhuesit më të mëdhenj të mishit në vend kanë shitur prej vitesh mish viçi dhe pulash të kalbur. Shumë prej këtij mishi që prodhohej nga kompanitë eksportohej në Europë dhe në vendet e tjera të botës.
