Inspektoriati Kombëtar I Mbrojtjes së Territorit njoftoi nëpërmjet faqes se vet në facebook se procesi për prishjen e 33 banesave në zonën e Unazës së Re do të mbyllet ditën e sotme.
Pavarësisht incidenteve të shumta, dhunës dhe kaosit që shoqëroi orët e para të punës, IKMT sqaroi se puna për prishjen e objekteve nuk do të ndalet. Madje sipas njoftimit, bëhet e ditur se shumica e ndërtesave janë prishur.
Deri në orën 15:00, sqaron IKMT, janë prishur 24 objekte nga 33 që janë në total.
Prej mëngjesit te sotëm IKMT ka nisur prishjen e 33 objekteve ne zonën e “Astir”. Deri në këto momente janë prishur 24 objekte, prej të cilave 8 objekte 2 katëshe, 4 tre katëshe dhe 12 nje katëshe. Objektet e tjera janë ne proces dhe do te prishen të gjitha brënda ditës së sotme.
Sipas të dhënave nga ky inspektoriat, 21 banesa nga ato që po prishen janë dëmshpërblyer ndërsa pjesa tjetër janë pa dokumenta.
Ndërkohe nga perleshjet e mengjesit të kësaj të martë janë plagosur të paktën 13 vetë, 5 policë dhe 8 banorë të Astirit.
