Policia britanike ka identifikuar terroristin e tretë të sulmit, që goditi Londrën. Ai është marokeno-italiani Youssef Zaghba, 22 vjeç. Sipas mediave italiane, 22 vjecari ishte ndaluar në vitin 2016 në aeroportin e Bolonjës, ndërsa do të udhëtonte drejt Stambollit, por me destinacion Sirinë. Ai kishte me vete vetëm pasaportën, biletën dhe një çantë të vogël, çka ngjalli dyshime gjatë kontrollit. Në celularin e tij u gjetën foto dhe video me përmbajtje fetare, por asgjë domethënëse për lidhje me xhihadistë. Megjithatë, në arkiva ai rezultonte si i dyshuar për luftëtar të huaj.
Shërbimet sekrete italiane njoftuan kolegët e tyre britanikë për lëvizjet e Zaghbas. Një ditë më parë u identifikuan dy terroristët e tjerë, Khuram Butt, 27 vjeç i lindur në Pakistan dhe Rachid Radouane, 30 vjeç. Policia britanike është vënë në shënjestër të kritikave, pasi njeri prej autorëve të sulmit ishte emër i njohur për të. Por ajo është mbrojtur duke thënë se nuk ka pasur informacione për planifikimin e ndonjë sulmi terrorist.
Aktualisht për sulmin që u mori jetën 7 personave dhe plagosi dhjetëra të tjerë ka vetëm një 27 vjeçar të arrestuar, ndërsa 12 të ndaluar më herët pas marrjes në pyetje janë lënë të lirë.
