49-vjeçari Flori Muka rezulton i zhdukur që prej datës 18 nëntor të vitit të kaluar.
Ndërkohë, tre muaj më pas, motra e tij ka folur për mediat dhe ka thënë se vëllai i saj shoqërohej me dy persona që nuk i njihnin, kur u kthye nga Greqia.
“Kemi 3 muaj që nuk kemi asnjë kontakt me të. Ai kur kthehej në Greqi këtu te unë vinte gjithmonë se shtëpia e babait është djegur plotësisht herën e fundit ka qenë këtu tek unë ka qëndruar pak se patëm një debat.
Me motrën tjetër që ka folur i ka thënë do shkoj të punoj në mandarinat në Sarandë. Unë dyshoj se mos ka krijuar lidhje me ndonjë atje (femër) dhe nuk do të flasë me ne ose dyshimi tjetër joni është se kur kishte tërhequr lekët kishte qenë i shoqëruar me 2 persona. Pronari kishte thënë që me ata persona që ishte shoqëruar nuk ishin të mirë, ndoshta i ka gjetur rrugës kur ka kaluar kufirin.
Unë them për këta të dy, kam dyshime po edhe për 50 mijë që ka tërhequr ai, ta vrasin? Nuk e di. Ne këtu dyshojmë telefoni përse nuk gjendet? Ne e kemi bërë denoncimin 3 muaj me vonesë se vëllai është larguar edhe njëherë nga banesa dhe thamë hë se do vijë por tani jemi në merak. Ne kemi bërë dy denoncime edhe djali i motrës edhe unë. U stepëm se patëm një debat me vëllain dhe tha; nuk dua të flas me njeri, do ju bëj block të gjithëve. Ai vinte qëndronte këtu tek unë me javë, por kishte dhe qejf pijen për këtë u zumë”, tha e motra.
49-vjeçari ka hyrë nga Greqia për në Shqipëri në datën 18.11.2023, pra rreth 3 muaj më parë.
Familjarët ndërkohë e kanë denoncuar si rast vetëm tani, ndërsa ende nuk dihet gjë në lidhje me pretendimet e tyre për zhdukjen e tij. Ndërkohë policia po vijon me kërkimet.
“Më datë 10.02.2024, në Komisariatin e Policisë Korçë, është paraqitur shtetasja D. M., 66 vjeçe, banuese në fshatin Biranj, e cila ka kallëzuar se ka humbur kontaktet me vëllanë e saj, shtetasin F. M., 49 vjeç, për vendndodhjen e të cilit, nuk ka dijeni. Menjëherë pas kallëzimit kanë nisur verifikimet, nga të cilat ka rezultuar se 49-vjeçari ka hyrë në Shqipëri, nga Greqia. Vijon puna për gjetjen e tij”, ka njoftuar policia për ngjarjen. /vizionplus.tv
