Lideri historik Sali Berisha mori besimin e demokratëve për të udhëhequr forcën politike më të madhe të opozitës në 4 vitet e ardhshme.
Premtimi i parë i Sali Berishës pas shpalljes së rezultatit ishte se Partia Demokratike do të fitojë përballë mazhorancës socialiste.
“Fitorja jonë është e pashmangshme, ky proces zgjedhor që mbyllet sot ka nxjerrë PD më të fortë se kurrë në ekzistencën e saj”, tha Berisha.
Berisha deklaroi se opozita do të vazhdojë betejën kundër kryeministrit Edi Rama deri në largimin e tij.
“Siç votuam të lirë sot, do të votojnë shqiptarët nesër, ky është betimi ynë. Ndaj Edi Rama dije mirë se për këtë ushtri 40-mijëshe ti ke zero legjitimitet, se edhe po të shkosh prapa hënës e prapa diellit, ti mbetesh hajdut. Ndaj dhe fundin e ke të shpejtë”, tha Berisha.
Në këto zgjedhje morën pjesë 39 mijë demokratë nga 51 mijë anëtarë që numëron Partia Demokratike. Pro Sali Berishës votuan 37,341 demokratë, 1,055 votuan kundër dhe 506 abstenuan.
Krahasuar me 4 vite më parë, kur Berisha u zgjodh kryetar i PD pasi shkarkoi Lulzim Bashën, bie në sy se pjesëmarrja dhe mbështetja për të ka rënë. Në vitin 2022 morën pjesë në votime 43,670 demokratë dhe votuan pro Sali Berishës 40,816 anëtarë.
Sali Berisha garoi pa rivalë në zgjedhjet e sotme dhe Partia Demokratike e cilësoi procesin si një referendum për mbështetjen e liderit historik të demokratëve.
Berisha nis mandatin e ri në krye të Partisë Demokratike në një periudhë të vështirë për demokratët.
PD ka 13 vite në opozitë, ka humbur 7 beteja elektorale përballë socialistëve të Edi Ramës dhe Sali Berisha duhet t’u tregojë demokratëve dhe opozitës se mund të fitojë përballë Partisë Socialiste.
