Ky është moment kur 41 vjeçari Mirgen Zalla i vendos tritol një lokali në Fushë Krujë dhe më pas largohet me vrap.
Ngjarja ndodhi 10 ditë më parë, ndërkohë që policia ka shpallur në kërkim Zallën dhe ka arrestuar bashkëpunëtorin e tij Mondi Topalli.
Mirgen Zalla, i cili mbante një kapele për të mos u identifikuar, pasi ka vendosur lëndën plasëse në lokalin e Bledar Talit, është larguar nga vendi i ngjarjes me automjetin e Mondi Topallit.
Gjatë kontrollit të banesës të Mirgen Zallës shërbimet e policisë kanë gjetur e sekuestruar një armë gjahu pa leje, një armë sportive dhe municion.
Ngjarja ndodhi në 31 janar, në vendin e quajtur ish-“Kooperativa Partizani”.
Pronari i lokalit “Brazili i Vjetër”, Bledar Tali nuk njihet si persona problematik në zonë dhe në dëshminë e tij në polici ai ka mohuar të ketë konflikte.
“Si rezultat i veprimeve hetimore dhe operacionale të kryera me qëllim zbardhjen dhe dokumentimin e plotë të ngjarjes së ndodhur me datë 31.01.2025, ku u dëmtua me lëndë plasëse, fasada e një lokali në Fushë Krujë, kanë bërë të mundur identifikimin dhe shpalljen në kërkim të autorit të ngjarjes shtetasin M. Z., 40 vjeç si dhe kapjen dhe ndalimin e shtetasit M. T., 41 vjeç, i identifikuar si bashkëpunëtori i shtetasit M. Z.
Shtetasi M. Z., dyshohet se ka vendosur lëndën plasëse në lokalin e shtetasit B. T., dhe më pas është larguar nga vendi i ngjarjes me automjetin e shtetasit M. T.
Gjatë kontrollit të banesës së shtetasit M. Z., shërbimet e Policisë kanë gjetur e sekuestruar një armë gjahu pa leje, një armë sportive dhe municion.
Shërbimet e Policisë po punojnë për kapjen e shtetasit M. Z.
Materialet procedurale iu referuan Prokurorisë së Tiranës, për veprime të mëtejshme”, thuhet në njoftim. /vizionplus.tv
