Ai bashkë me Mavrajn do të jetë një nga mungesat e mëdha të Kombëtares, në përballjen e 24 marsit me Italinë, për shkak skualifikimi. Por Berat Xhimshiti, megjithëse do ta shohë ndeshjen nga tribuna e stadiumit, kërkon që të jetë në grumbullim, i gatshëm për miqësoren e mëpasshme që do të ketë Shqipëria ndaj Bosnjes. “Nuk e di nëse De Biazi do të më thërrasë, por gjithsesi do të doja të luaja kundër boshnjakëve”, ka deklaruar mbrojtësi i Avelinos.
Për momentin, Xhimshiti mbetet i përqendruar te kampionati që duhet të përballojë me skuadrën e Serisë B italiane. Mbrojtësi është gati të marrë vendin e titullarit, pas një jave pezullimi që mori si rrjedhojë e kartonit të kuq me të cilin u ndëshkua përpara dy ndeshjesh kundër Peruxhias. Këtë fundjavë, Avelino pret Novaran dhe i duhet patjetër të reagojë pas dy humbjeve. “Kemi pësuar shumë gola së fundi, mëtepër edhe sesa në 9 ndeshjet e para.Për këtë ipranoj fajet e mia. Megjithatë ndaj Specias u pa një lloj reagimi për mirë e duhet të na shërbejë si bazë për t’iu kthyer rezultateve pozitive”, thotë 24-vjeçari.
Sa i takon të ardhmes, Xhimshiti mund të kthehet tek Atalanta, aty ku shihet si një pasardhës i mbrojtësit Kaldara, i cili do të transferohet te Juventusi. “Natyrisht, e mendoj një të ardhme në Serinë A. Gjithsesi, aktualisht duhet të fokusohem tek Avelino.Këtu po përmirësohem në disa drejtime. Seria B është ndryshe nga Seria A. Ky kampionat është më i vështirë, pasi ka sulmues më të vendosur dhe të fortë fizikisht, sesa ata të Serisë A që janë më teknikë”, ka shpjeguar mbrojtësi i Avelinos, ekip qëmban vendin e 13-të, 5 pikë larg zonës së rrezikut.
