Në kushtet, kur koalicionet opozitare kanë siguruar 41 vota dhe kanë nisur bisedimet për bashkëpunim mes tyre, partia e liderit afatgjatë, Milo Gjukanvoic duket se i ka varur shpresat tek katër mandatet e shqiptarit që kryeson koalicionin “E zeza në të bardhë”, Dritan Abazoviç.
Në një intervistë për Vizion Plus, kandidati për deputet nga radhët e partisë demokratike socialiste, Nikollë Gegaj shprehet se ardhja në pushtet e forcave pro ryse dhe atyre pro serbe rrezikon sovranitetin e vendit por do të shkaktojë trazira edhe në rajon.
Nuk është tragjedi të ndërrohet pushteti pas 30 viteve thotë Nikollë Gegaj, por tragjedi do të ishte realizimi i planit nacionalist serb.
Gegaj shprehet i bindur për mbështetjen tradicionale të partive shqiptare dhe vlerëson se dy mandatet e fituara në parlament, do të kenë ndikimin e nevojshëm për të mbrojtur kursin pro europian të Malit të Zi.
Procesi i ankimimit të votave pas zgjedhjeve parlamentare të 30 gushtit në Mal të Zi nuk solli asnjë surprizë në lëkundjen e mandatit të 41 që mund të ndryshonte kursin e pushtetit. Në një qendër votimi në Petnjica do të rivotohet ditën e enjte ndërsa rezultati zyrtar i zgjedhjeve pritet më 14 shtator.
