Pas deklaratës së PD-së në Fier mbi shoqerimet e mbi 50 personave në polici për protestat e një ditë më parë në Roskovec dhe Patos, ka reaguar edhe policia e shtetit.
Forcat e rendit kanë dhënë një informacion zyrtar në lidhje me personat e përfshirë në incidentet dhe përplasjet mes qytetareve dhe policisë të premten kur u tentua bllokimi i rrugës pas vizitës në Fier të kryeministrit Rama.
Policia e Shtetit konfirmoi se ka arrestuar në flagrancë 4 shtetas si dhe ka proceduar penalisht në gjendje të lirë 41 shtetas të tjerë.
Të arrestuarit në flagrancë për veprat “Pengimi i qarkullimit të mjeteve të transportit” dhe “Organizimi dhe pjesëmarrja në grumbullime dhe manifestime të paligjshme”, janë shtetasit: H.H, 59 vjeç, banues në Patos; G.B, 56 vjeç, banues në Patos; B.J, 56 vjeç, banues në Patos; B.Xh, 56 vjeç, banues në Roskovec.
Janë proceduar në gjendje të lirë edhe 41 shtetas të tjerë për veprën penale “Organizimi dhe pjesëmarrja në grumbullime dhe manifestime të paligjshme”.
Vazhdon puna për identifikimin dhe vënien përpara përgjegjësisë ligjore edhe të personave të tjerë, të cilët kanë marrë pjesë në këto grumbullime të kundraligjshme.
