Gjykata e Durrësit ka dhënë vendimin përfundimtar për ngjarjen e rëndë që tronditi opinionin publik, ku Hysen Meta vrau babanë e tij, Pëllumb Metën.
Sipas vendimit të shpallur këtë të enjte, më 23 tetor 2025, Hysen Meta u shpall fajtor për “vrasje për shkak të marrëdhënieve familjare” dhe u dënua me burgim të përjetshëm.
Hysen Meta do të vuajë dënimin në një burg të sigurisë së lartë.
Motra e Hysen Metës, Hygerta Meta u dënua me 8 vite burg, nga 30 vite që kishte kërkuar prokuroria ndërsa i vëllai, Amarildo Meta është dënuar me 5 vite burg.
E ëma e tre fëmijëve, apo bashkëshortja e viktimës, Blerina Meta është dënuar me 3 vite burg. Në sallën e gjyqit i pranishëm ka qenë vetëm Amarildo Meta.
Mbrojtja e ka kundërshtuar vendimin duke thënë se do ta apelojnë në një shkallë më të lartë gjykimi.
Shqiponja Meta, avokate që mbronte të pandehurit Hysen dhe Amarildo Meta tha se priste një dënim më të butë për Hysen Metën, ndërkohë që shtoi se nuk mund të jepet maksimumi i dispozitës për “Fshehje të kufomës” për Amarildo Metën që u dënua me 5 vjet heqje lirie.
“Ne do të ankohemi në Gjykatën e Apelit të Përgjithshëm në Tiranë, sidomos për sa i përket burgimit të përjetshëm të të pandehurit Hysen Meta. Unë mendoj që mund të kishte një masë më të butë dënimi. Amarildo Meta është dënuar me maksimumin e dispozitës për fshehje të kufomës. Do të ndjekim rrugët ligjore. Për aq sa ka bërë duhet të mbajë përgjegjësi ai që e ka kryer krimin. Nuk mund të mbajë përgjegjësi një familje e tërë. Burgimi i përjetshëm ka kushte për t’u ankimuar. Në kokën që ka kryer krimin ka qenë vetëm 24 vjeç, në kushtet e një dhune verbale që nga dita që ka lindur deri në ditën që ka realizuar vrasjen. Ai ka qenë i tronditur në kohën që ka kryer krimin. I ka dërguar Gjykatës një letër ku kërkon ndjesë. Motivi ka qenë dhuna e vazhdueshme”, tha avokatja.
Avokati tjetër që mbronte Hygerta Metën e ka mirëpritur vendimin e dhënë për të, e cila në total për dy vepra penale u dënua me 8 vjet heqje lirie.
“Vendimi i Gjykatës ishte i drejtë sa i përket të pandehurës Hygerta Meta”, tha avokati Kreshnik Poga.
