Hyn në fuqi pakti për emigrantët

Një foshnje katërmuajshe ishte viktima e fundit në radhët e refugjatëve sirian, përpara se marrëveshja BE-Turqi për emigrantët të hynte në fuqi. Një varkë me 22 refugjatë u fundos në brigjet Turqisë në detin Egje, ndërsa ishte nisur drejt Greqisë. 21 refugjatët u shpëtuar nga rojet bregdetare, turke, ndërsa foshnja, një vajzë 4-mujashe humbi jetën. Ndërkohë pakti mes Brukselit dhe Ankarasë, hyri formalisht në fuqi. Sipas tij, të gjithë emigrantët që mbërrijnë në Greqi, do të kthehen mbrapsht në Turqi. Dhe për çdo të kthyer, do të ketë një azilant nga radhët e refugjatëve sirian, që janë strehuar në shtetin turk. Megjithëse autoritetet greke janë shprehur të vendosura për zbatimin e marrëveshjes, mbetet për t’u parë si do të procedohet. Ata do të asistohen nga 2 mijë e 300 ekspertë të sigurisë dhe përkthyes, që janë ngarkuar më zgjidhjen e kësaj situate.
Në këmbim të frenimit të fluksit të emigrantëve drejt vendeve të BE-së, Turqia do përfitojë 3 miliardë euro si dhe do të përshpejtohet procesi për anëtarësimin e këtij vendi në BE, përfshi dhe liberalizimin e vizave. Që nga janari i vitit 2015, një milion emigrant kanë hyrë në BE, pasi kanë mbërritur me anije nga Turqia në Greqi. Aktualisht, me mbylljen e rrugës ballkanike, më shumë se 14 mijë refugjatë, kanë mbetur të bllokuar ne kufirin greko-maqedonas.