Bashkimi Evropian ka propozuar ndërprerjen graduale të importeve të naftës së papërpunuar ruse brenda gjashtë muajve dhe produkteve të rafinuara deri në fund të vitit, por Hungaria ka vendosur veton që pengon mbështetjen unanime të nevojshme, nga 27 vendet anëtare të bllokut.

 

PETER SZIJJARTO

 

MINISTER I JASHTEM, HUNGARI

 

“Propozimi i Bashkimit Evropian për sanksionet e naftës kundër Rusisë do të shkatërronte ekonominë hungareze dhe nuk ofron një zgjidhje për problemet e mëdha që do të krijonte në të ardhmen. Pas bisedimeve të zhvilluara deri më tani, Komisioni Evropian nuk ka një zgjidhje, kështu që e vetmja mënyrë për një marrëveshje për një embargo të naftës do të ishte nëse ajo do të zbatohej për dërgesat e naftës detare. Nafta ruse përmes tubacioneve do të përjashtohej plotësisht.”

 

Hungaria nuk ka dalje në det dhe duhet të mbështetet në tubacione për furnizimet e energjisë, por përshtatja e tyre për të përpunuar naftë nga burime jo-ruse do të zgjaste të paktën pesë vjet dhe do të kërkonte një investim masiv. Kryeministri Viktor Orban ka deklaruar se kjo do të nxiste më tej çmimet e larta të energjisë, duke shtuar edhe papunësinë.

 

Qeveria nacionaliste hungareze, një nga më miqësoret me Moskën në Bashkimin Evropian, këmbëngul se nuk do të mbështesë asnjë sanksion që synon ndalimin e eksporteve ruse të energjisë.

 

Vendi siguron rreth 85 për qind të gazit natyror dhe më shumë se 60 për qind të naftës nga Rusia dhe e konsdieron bojkotin si një bombë bërthamore për ekonominë.

Leave a Reply

Your email address will not be published.