Dhjetëra mijëra hungareze kanë dalë në protestë në kryeqytetin Budapest për të kundërshtuar një ligj të miratuar nga parlamenti, që mund të çojë në mbylljen e njërit prej universiteteve më prestigjioze në vend dhe në botë, të themeluar nga filantropi i njohur Goerge Soros. Soros ka qenë së fundi në shënjestër të kryeministrit Victor Orban, që e ka akuzuar për përfshirje në politikën e disa shteteve dhe se po nxit emigracionin në Europë, ndërsa universitetin e ngritur 26 vite me parë, ai e sheh si bastion të pikëpamjeve liberale.
Sipas ligjit që pritet të firmoset nga presidenti Janos Ader, Universiteti i Europës Qendrore nuk do të mund të firmoste diplomat, pasi është i regjistruar në SHBA. Ligji nuk lejon që universitetet jashtë BE të japin diploma dhe qeveria hungareze nuk ka një marrëveshje për diplomat me qeverinë e SHBA. Ligji mund ta detyrojë Universitetin të largohet nga Hungaria, ku ka një godinë dhe një kampus në qendër të kryeqytetit Budapest, pasi ai kërkon që universitetet të kenë një kampus edhe në vendin e origjinës. Qeveria ka ashpërsuar rregullat edhe për organizatat joqeveritare që financohen nga multimiliarderi.
Në protestën paqësore morën pjesë studentë, pedagogë dhe prindër, që hodhën parullat; Europë, Europë. Kjo është vlerësuar si një ndër protestat më të mëdha te viteve të fundit.
