Himara çel sezonin turistik
Ka nisur sezoni turistik në Jug të vendit, e saktësisht në Pilur, ku bashkia e Himarës së bashku me Ministrinë e Turizmit, mirëpritën në një festival të gjithë të apasionuarit pas sporteve, por edhe traditës.
Në tre ditë, “South Outdoor Festival” prezantoi për turistët shqiptarë e të huaj më të mirën e natyrës së jugut, etnografisë e kulinarisë së këtyre anëve. Pritja ishte me thesarin e këtyre anëve, isopolifoninë.
Panairi i organizuar nga artizanët dhe banorët e zonës prezantonte edhe më shumë, nga vaji i ullirit me erëza që ndoshta nuk i keni dëgjuar e deri tek bizhutë me materiale te riciklueshme.
Piluri në tre ditë nuk ishte vetëm vendi i të rinjve që niseshin për më shumë adrenalinë në një terren të vështirë, por edhe i fëmijëve, të cilët kishin këndet e tyre të argëtimit.
Përtej kushteve të vështira, organizimi ishte i mirëpërgatitur, nisur nga transporti e deri tek energjia elektrike që i dha dritë malit deri në orët e vona të mbrëmjes ku muzika live jehonte.
Për kryetarin e Bashkisë Himarë, ky festival do të kthehet në traditë.
“South Outdoor Festival” e kane vizituar edhe ministrat Milva Ekonomi e Damian Gjiknuri, që i janë bashkuar premtimit të Goros, me qëllimin e vetëm që sezoni turistik në jug të vendit të zgjasë më shumë nisur nga maji, ku terreni ofron shumë për sportdashësit.
