Sezoni i ri i basketbollit do të nisë në 13 tetor. Mesditën e kësaj të marte është hedhur dhe shorti që ka përcaktuar kalendarin ku skuadrat kanë mësuar kundërshtarin në xhiron e parë. Superliga shqiptare përbëhet nga 6 skuadra dhe me tërheqjen e durrsakëve të Goga Basket, vendin e ka marrë një tjetër skuadër e kryeqytetit si Dinamo. Sekretari i Përgjithshëm i Federatës së Basketbollit, Korab Llazani në një intervistë për Vizion Plus ka treguar pritshmëritë e sezonit, ndërsa nuk ka lënë pa përmendur dhe vështirësitë e vitit të kaluar.
“Kemi kaluar një vit të vështirë. Të mbushur me ndeshje, por falë zotit ia kemi dalë. E them me bindje se ia kemi dalë pas një rrugëtimi të vështirë, por që ilaçi më i mirë për Covid-19 ishte loja në parket. Nga ajo cfarë kam komunikuar dhe me drejtuesit e klubeve, forma e lojtarve është e mirë dhe janë gati për të filluar. Virusi tani është familjarizuar dhe me skuadrat, është bërë pjesa e jona.”
Llazani është shprehur se protokollet anticovid mbetën në fuqi, ndonëse, sipas tij, ky virusi është familjarizuar me sportin.
“FIBA na ka sjellë prtokollet përkatëse dhe ne kemi riformuluar sipas kushteve tona. Çdo lojtar, përpara çdo takimi duhet të paraqesë certifikatën e vaksinimit apo që e ka kaluar covid-in. Sot ka shumë mundësi që mund të kuptosh gjendjen e lojtarit, vaksinimi, tamponi, testi PCR. Patjetër një nga këto duhet ta ketë.”
Java e parë rezervon një derbi si Dinamo-Partizani, ndërsa blutë e kryeqyteti presin Vllazninë. Fati ishte me kampionët e Teutës, që kanë një ndeshje të lehtë ndaj Kamza Basket. Edhe për këtë sezon, palestrat do të mbushen vetëm me 30 % të kapacitetit të lejuar.
