Drejtuesit e policisë së shtetit dhe prokurorisë së Tiranës kane bindjen se së shpejti do të zbardhet skandali i publikimit e të dhënave të personave të më shumë se 600 mijë qytetarëve. Kryeprokurorja e Tiranës, Elisabeta Imeraj siguron se autori i cili prej disa ditësh ka publikuar listat e pagave, të dhënat personale, por edhe të targeve të mjeteve, do të arrestohet.
“ELIZABETA IMERAJ
Jemi të bindur që deri në fund të këtij hetimi hetimet do të jenë intensive dhe do të konkludohet me vendimarrje konkrete. Normalisht që do të kemi autor.”
Edhe numri dy i policisë së shtetit ka konfirmuar se po punohet me të gjitha agjencitë ligjzbatuese për të gjetur fajtorët.
“TONIN VOCAJ
Ne jemi përfshirë në grupin hetimorë bashkë me Prokurorinë e Rrethit të të Tiranës dhe jemi duke kryer të gjitha veprimet e nevojshme qoftë me iniciativë, qoftë të urdhëruara apo të deleguara nga Prokuroria.”
Në lidhje me arrestimin e 35 personave për mashtrim përmes Call Centerave,L Vocaj tha se janë sekuestruar një serë pajisjesh që përdoreshin nga të arrestuarit për të mashtruar qytetarët e BE.
“TONIN VOCAJ
U arrestuan në flagrancë 35 shtetas nga të cilët njëri shtetas i huaj dhe pikërisht shtetasi Rafael Genish. U proceduan në gjendje të lirë 20 shtetas të tjerë. Janë sekuestruar në cilësinë e provës materiale123 pajisje kompjuterike, 60 pajisje të telefonisë së levizshme, 3 laptopë, 2 usb, karta të bardha të ngjashme me ato të bankave si dhe një sasi e vogël e lëndës narkotike kanabis sativa.”
Vocaj tha se janë më shumë se 2 milionë persona të mashtruar.
“TONIN VOCAJ
Personat të kontaktuar nga kjo skemë mashtrimi janë mbi 2 milionë dhe ndodhen në shtete të ndryshme.”
Shtetasi izraeli Rafael Genish, përmes Call Centerit të ngritur në Tiranë, arriti që të mashtrojë mbi 2 milionë qytetarë të BE. Qytetarëve të ndryshëm u premtohej se pas investimeve me vlera mbi 500 euro do të kishin fitime marramëndëse në bursa ndërkombëtare.
