Në ditën e dytë të seancës gjyqësore në Hagë, ish-presidenti Hashim Thaçi ka kërkuar pafajësinë. Ai shprehu keqardhje për të gjitha viktimat e luftës, pavarësisht përkatësisë së tyre.
HASHIM THACI
ISH-PRESIDENT I KOSOVES
Ndjej keqardhje dhe dhimbje për të gjitha viktimat e luftës pavarësisht nga përkatësia, viktimat nuk marrin drejtësi kur të pafajshmit ndiqen. Une jam i pafajshem për te gjitha keto akuza.
Më tej, Thaçi nënvizoi se falë rezultateve të këtij procesi gjyqësor, Kosova dhe emri i tij do të pastrohen nga akuzat për trafikim organesh.
“Bota tani e di sot si rezultat i këtij procesi se nuk kishte trafikim organesh dhe se Shtëpia e Verdhë nuk ka ekzistuar kurrë. Tani e dimë se edhe unë edhe UÇK-ja, populli i Kosovës dhe gjithë shqiptarët jemi shfajësuar nga këto akuza. E vërteta është thënë dhe rreja e zezë mbi Kosovën është hequr. Pra, kjo sakrificë ja ka vlejtur.”
Thaçi u shpreh i keqardhur që figura si presidenti Ibrahim Rugova, sekretarja amerikane Madlen Albright, sekretari i jashtëm britanik Robin Cook, ambasadori Richard Holbroke, apo emra të tjerë nuk do të mund të dëgjohen si dëshmitarë.
Më herët gjatë seancës, avokatët e ish-presidentit Thaçi kundërshtuan akuzat e ngritura ndaj tij, duke argumentuar se ai nuk kishte pasur fuqi komande në Ushtrinë Çlirimtare të Kosovës, gjatë periudhës që pretendon prokuroria. Pushteti gjatë luftës, sipas mbrojtjes, ishte në duart e komandantëve të zonës e jo të Shtabit të Përgjithshëm.
Sipas avokatëve, disa herë pas luftës Thaçi ka bërë thirrje që të ndalet dhuna ndaj serbëve lokalë dhe që ata të mos largohen nga Kosova.
