Kryeministri i Kosovës, Ramush Haradinaj i kërkoi kancelarit austriak Sebastian Kurz liberalizimin e vizave për Kosovën.
Në një postim në “Facebook”, Haradinaj duke u ndalur tek takimi i Vienës që u zhvillua nga kancelari austriak dhe komisioneri Johannes Hahn, u shpreh se deklaroi para këtyre të fundit se Kosova ka përmbushur të gjitha kriteret e vendosura nga BE dhe se vizat duhet te liberalizohen.
Sipas Haradinajt, Kosova është e gatshme të marr përsipër obligimet e saj në fuqizimin e bashkëpunimit rajonal.
“Sot, në Vjenë të Austrisë zhvilluam një mëngjes pune me kancelarin Sebastian Kurz dhe liderët e vendeve të Ballkanit Perëndimor, ku theksova se Kosova është e përkushtuar në fuqizimin e bashkëpunimit rajonal dhe e gatshme të marrë përsipër obligimet e saja, por se kjo duhet të jetë reciproke. I njoftova homologët se vendi ka shënuar progres në implementimin e MSA-së dhe ERA 1 dhe se tani po presim edhe lansimin e ERA 2. Kosova është vendi i vetëm në BE dhe rajon që ende nuk lëvizë lirshëm dhe nga Kancelari Kurz kërkova që liberalizimi i vizave, të futet në agjendën e BE-së, sepse Kosova ka përmbushur të gjitha kriteret e vëna nga BE. Përveç të drejtës tonë për lëvizje të lirë, liberalizimi i vizave për Kosovën do të thotë më shumë partneritet, më shumë treg e mundësi këmbimi për vendet e BE-së dhe rajonit”
Në takimin e zhvilluar në Vienë ku fokus i diskutimeve ka qenë perspektiva evropiane e Ballkanit Perëndimor, bashkëpunimin rajonal, marrëdhëniet dypalëshe dhe kriza e refugjatëve, ka qenë I pranishëm dhe kryeministri Edi Rama.
