Pas deklaratës së bërë të enjten nga presidenti serb Aleksandër Vuçiç se nuk I njeh kufijtë e Kosovës, ka reaguar kryeministri Ramush Haradinaj.
Në një postim në “Facebook”, Haradinaj i cilësoi deklaratat e Vuçiç si kërcënuese dhe agresive.
Haradinaj shprehet se ai do të marrë të gjitha masat që I lejon Kushtetuta e Kosovës pasi, sipas tij, Vuçiç po nxit luftë ne rajon.
“Deklaratat e fundit kërcenuese, agresive dhe luftënxitëse të Presidentit të Serbisë, Aleksander Vuçiq, të dhëna dje me datë 7 shkurt 2019 në qytetin e Vranjës, Serbi, se nuk i njeh kufijtë e Kosovës, kufijtë ndërkombëtarisht të njohur dhe të pranuar në Jarinjë dhe Bërnjak, janë të papranueshme dhe paraqesin cenim serioz të sovranitetit dhe integritetit territorial të Kosovës. Këto deklarime janë edhe një atak i hapur ndaj sovranitetit dhe integritetit territorial të Kosovës, si dhe rrezikojnë paqen, stabilitetin dhe sigurinë në Kosovë, rajon dhe më gjerë. Si kryeministër i Republikës së Kosovës zotohem se do të ndërmarr të gjitha veprimet kushtetuese dhe ligjore me qëllim të ruajtjes së sovranitetit dhe integritetit territorial të Kosovës, në përputhje me Deklaratën e Pavarësisë së 17 shkurtit 2008 dhe me Kushtetutën e Republikës së Kosovës.”
