Pas më shumë se 2 muaj afat për aplikimin, policia e shtetit ka mbyllur aplikimet për studentët që aspirojnë të jenë oficerë të krimeve.
Përmes një njoftimi për mediat policia bën me dije se kanë aplikuar 246 kandidatë për të plotësuar 100 vendet vakante.
Nga këta aplikime janë 246 studentë, që vijnë nga degët Ekonimik, Juridik dhe Teknologji që kanë aplikuar për 100 vendet e kuotuara, për tu bërë oficerë të hetimit të krimit.
“Në bazë të kritereve të vendosur nga drejtori i përgjithshëm i policisë, pritet verifikimi i dokumentacionit për të përzgjedhur 100 studentët më të mirë. Ndërkohë pas verifikimit të dokumentacionit nga burimet njerëzore të DVP-ve, aplikantët që do rezultojnë se plotësojnë kushtet do vijojnë me procedurat e tjera të përzgjedhjes, atë të testimit të gjuhës angleze dhe më pas me kontrollin mjekësor. Aplikimet u bënë pranë Drejtorive Vendore, Komisariateve të Policisë, si dhe përmes aplikimit online në Akademinë e Sigurisë. Aplikimet janë mbyllur mbrëmjen e të dielës. Sipas një njoftimi të policisë së shtetit, vendet vakante janë hapur me qëllim plotësimin e funksioneve të lira organike, të cilët do të përzgjedhen me barazi dhe paanshmëri. 100 studentët e përzgjedhur pritet të japin kontribut në rritjen e parametrave të sigurisë dhe rritjen e cilësisë së luftës kundër krimit ekonomik e financiar, pastrimit të parave dhe krimit kibernetik.”
