Grekët hapin në mënyrë të dyanshme kufirin me Shqipërinë. Kjo ka bërë që pasditen e sotme, qindra shqiptarë që jetojnë e punojnë në vendin fqinj të vijnë në Shqipëri për t’u takuar me familjarët e tyre.
Ka prej atyre që kanë një vit, por dhe të tjerë që kanë dy vite pa u takuar me njerzit e afërt. Lajmin se pika e kalimit kufitar të Kapshticës i është kthyer normalitetit në të dy anët e kufirit ka bërë të mundur lëvizjen e shqiptarëve jo vetëm me mjetet e tyre private, por edhe me linjat e autobusëve, gjë e cila ndodh pas 7 muajsh.
Nga ana tjetër, burime të siguruara thanë se ditën e sotme nga Shqipëria në drejtim të Greqisë kanë kaluar me mjetet e tyre shqiptarë që kanë dokumente greke, por edhe shqiptarë të tjerë të cilët dispononin formularin PFL, si dhe kryerjen e tamponit 72 orë para kalimit në Greqi.
Po ashtu, ditën e sotme, nga Kapshtica në drejtim të Greqisë kanë kaluar edhe shtetas të huaj. Nga dita e sotme, të dy korsitë e daljes nga Shqipëra në drejtim të Greqisë kanë qenë të hapura.
