Rusia do të kufizojë vizat për të gjitha vendet “jomiqësore” të Kremlinit, ku mes tyre përfshihet edhe Shqipëria. Në një intervistë për mediat serbe, ministri i Jashtëm rus, Sergei Lavrov, deklaroi se Shtetet e Bashkuara të Amerikës dhe aleatët e saj shpallën një luftë hibride ndaj Moskës edhe për këtë arsye duhet t’i përgjigjen.
SERGEI LAVROV
MINISTËR I JASHTËM, RUSI
“Perëndimi nuk e fsheh qëllimin e këtij konfrontimi, të shkatërrojë ekonominë ruse, të minojë stabilitetin e brendshëm politik dhe, në fund, të dobësojë ndjeshëm Rusinë. Vendet perëndimore kanë arritur konfiskimin e pronës private dhe heqjes dorë nga detyrimet në sferën financiare. Këto akte kanë sjelle një sërë kufizimesh për hyrjen në territorin e Rusisë. Dekreti përkatës është duke u përpunuar.”
Ministri rus u ndal edhe të kërkesa e vazhdueshme e Prishtinës për t’u anëtarësuar në NATO. Sipas tij, Kosova ka qendruar në krah të Ukrainës vetëm për të shfrytëzuar situatën.
SERGEI LAVROV
MINISTËR I JASHTËM, RUSI
“Pozicioni ynë dihet. Ne paralajmëruam për papranueshmërinë e inkurajimit të qëndrimeve të Prishtinës zyrtare. Marrëveshja për formimin e një bashkësie të komunave serbe është bërë që prej vitit 2013 dhe nuk eshte zbatuar. Kur u kujtojmë kolegëve tanë perëndimorë se ajo nuk është pranuar ata heshtin.”
Lavrov ka lënë hapur mundësinë që bisedimet mes delegacioneve të Rusisë edhe Ukrainës, të zhvillohen në Beograd.
