Deputetja e opozitës, Rudina Hajdari zbuloi arsyen pse zgjodhi që në zgjedhjet e prillit të kandidojë për deputete në qarkun e Elbasanit. Ajo tregoi për “Quo Vadis” se një vendim i tillë erdhi sepse e sheh veten si një kandidate të fortë.
“Nuk është një gjë e lehtë prandaj kam vendosur që të shkoj në Elbasan. Sepse e para, mendoj se jam një kandidate e fortë, jam një njeri që bëj atë që them dhe të gjithë mandatin 4 vjecar, ose më pak se 4 vjet, të gjithë mandatin unë e vura në shërbim të fuqizimit të qytetarëve dhe jo në fuqizim të karrierës time politike. Sepse po të kisha zgjedhur atë rrugë do të kisha bërë dicka tjetër. Pra, do të kisha lënë mandatin po të kisha zgjedhur thjeshtë karrierën time politike, por bëra të kundërtën. Mbajta mandatin duke e vendosur veten time në dispozicion të qytetarëve, duke dashur për të përfaqësuar ata njerëz që vërtet mendoni se braktisja e mandatit, dobësimi i institucionit të parlamentit ishte një vendim i gabuar.”
Ajo shtoi se ky vendim është lidhur edhe me kujtimet e fëmijërisë që ka në Elbasan sepse është prejardhja e familjes së saj. Nga ana tjetër, përballë moderatores Pranvera Borakaj, Rudina Hajdari deklaroi se ajo synon të luftojë krimin e organizuar në Elbasan.
“Elbasani është damkosur si një qytetë që mbizotëron krimi i organizuar dhe jo vetëm në Elbasan, jo vetëm në qytet, sepse qarku i Elbasanit është i madh. Kemi Prenjasin, kemi Peqinin, kemi Gramshin, kemi Librazhdin dhe të gjitha këto qyteza, si mund të thuash, të gjitha janë damkosur sikur këtu lulëzon krimi i organizuar dhe e gjithë kultura e Elbasanit, ashtu si njihet historikisht ku ka shumë intelektual, ku ka njerëz që vërtetë e duan Shqipërinë, kulturën, e duan në mënyrë të ndershme. Të gjithë ata nuk ndihen të përfaqësuar në Kuvendin e Shqipërisë dhe duke e vënë veten time në dispozicionin e tyre, duke dashur që ta luftoj këtë fenomën kaq të shëmtuar që përbëhet prej pak njerzish por kanë pushtet politik. Këta që janë pjesë e krimit të organizuar dhe kanë bllokuar qytetin, qarqet, kanë hequr shpresën tek të rrinjtë, e kanë bërë Elbasanin, e kanë kthyer në një qytet që njihet tashmë sikur aty lulëzon vetëm krimi i organizuar dhe asnjë gjë tjetër.”
