Në përpjekje për gjetjen e një zgjidhjeje për krizën në Maqedoni, e cila ende nuk ka një qeveri, komisioneri për Zgjerimin, Johannes Hahn dhe tre eurodeputetë vizituan Shkupin, për të takuar liderët politikë. Bisedimet ata i nisën me krerët e partive shqiptare, kryetarin e BDI, Ali Ahmeti dhe atë të Lëvizjes Besa, Bilal Kasami dhe përfaqësuesin e Aleancës për Shqiptarët, Zijadin Sela.
Pas takimit Ali Ahmeti tërhoq vëmendjen që të gjendet një zgjidhje përmes dialogut dhe që kriza politike të mos shndërrohet në krizë ndëretnike.
“Sigurisht që ne duhet të dialogojmë, sigurisht që ne duhet të kërkojmë zgjidhje për të mos e dërguar situatën deri në ato nivele dhe të dëshpërojmë miqtë tanë, në këtë rast BE-në, sepse nuk do të ishte mirë për asnjë forcë politike as nuk do të ishte mirë për vendin tonë, por duhet t’i grumbullojmë energjitë pozitive dhe t’i vëmë në funksion të zgjidhjes së krizës politike dhe jo të ngarkesave me rrezikshmëri të lartë që mund të çojnë në përplasje etnike.”
Ndërsa kryetari i LSDM, Zoran Zaev u shpreh se nuk duhet humbur kohë për daljen e vendit nga kriza.
“Porosite e Hahn dhe eurodeputetëve janë të qarta. Proceset duhet të vazhdojnë dhe të përshpejtohen, çdo ditë e humbur është ditë e humbur për qytetarët e Maqedonisë dhe për perspektivat euroatlantike. Unë shpresoj se me ndihmën e miqve tanë evropiane do të vazhdojmë proceset tona për zhbllokimin e krizës”
Presidenti Ivanov refuzoi te takohet me eurokomisionerin, duke përmendur si argument kthimin vone nga vizita shtetërore ne Hungari.
Ndërkaq, përfaqësuesit e grupeve parlamentare nuk arritën të zgjedhin kryetarin e komisionit për Zgjedhje dhe Emërime, çka do t’i hapte rrugë vijimit të seancës konstituive të parlamentit.
